افكار جديدة للبرنامج الاذاعى

1- الفكرة الأولى:
التوأم وهي عبارة عن اعلان في الإذاعة عن التوائم الموجودة في المدرسة
ويطلعون بالطابور ويوقفون صف واحد ونحييهم ويكون فيها نوع من الاكشن ولفت
الانتباه واخر شي تعطونهم هدايا رمزية
2- الفكرة الثانية:
حوار صريح مع مديرة المدرسة تحطون طاولة وكرسيين ويصير مثل لقاء قصير مع
المديرة وتسئلينها 3 اسئلة( طبعا مع اي ناظره الناظره اللي تحسين فيها
تتقبل هالشي) انا عن نفسي سويت هالشي مع ناظرتنا واستانسنا بالطابور
السؤال الاول (على من تطلقين لقب المعلمة الهادية؟
السؤال الثاني( على من تطلقين لقب المعلمة المطيعة؟
السؤال الثالث ( على من تطلقين لقب المعلمة النحلة؟ ( يعني المعلمة الشاغولة واللي تكرف وايد بالمدرسة)
وطبعا كل اسم تقوله الناظرة يطلعون المدرسات ونعطيهم جوائز
3-الفكرة الثالثة
( من هي)
صورة للمعلمة وهي صغيرة وتكبرينها وتعرضينها بالطابور وهذه المسابقة
للمعلمات واللي تتعرف على هالمعلمة لها هدية ( انا اخترت صورة الاخصائية
وصورتي ) وكانت الصراحة مفاجأة واكشن حلو بالطابور
4- الفكرة الرابعة
( شخصية مشهورة) وهذه الصراحة عجبت الكل
اتفقت مع داعية السعودية مشهور بالمحاضرات تحضر طابور الصباح عشر دقايق
وتنصح التلاميذ وخصوصا ان بهالوقت توهم حاطين كراسي يديدة وطاولات بالصفوف
فكان ينصحهم بالمحافظة على مرافق المدرسة واخر شي شكرناه وقدمت له الناظرة
درع
5-الفكرة الخامسة
( مسابقة بدون نعم او لا)
تختارين معلمة وتسئلينها كذا سؤال بس بشرط تكون اجاباتها بدون نعم او لا
يعني مثلا تقولين لها شنو اسمج تقول منى تقولين لها منى؟ لازم تقول منى
ماتقول اي منى شنو سيارتج تقول مرسيدس تقولين لها متأكدة ويكون جوابها
متأكدة مو اي متأكدة............ ...... الخ
6- الفكرة السادسة:
( تعرف على هذه الشخصية)
مثلا تبدين كلامج وتقولين ( شخصية مشهورة في المدرسة لا نستطيع الدخول
والخروج ا والاستئذان إلا عن طريقها تقدس الساعة وتهتم جدا بالوقت ودائما
في مكتبها لا تحضر حصص) من هي طبعا الجواب المديرة المساعدة ( الوكيلة)
مثلا ( شخصية مشهورة في المدرسة تحل اي مشكلة وتتجول بالمدرسة لحل مشاكل
التلاميذ واول حرف من اسمها........ من هي ( الجواب طبعا الاخصائية
الاجتماعية)
مثلا ( شخصية مشهورة في المدرسة لا يحضر حصص ولا يقف بالطابور ولا يحمل
حقيبة ولكنه دائما موجود في المدرسة يستقبل الجميع عند الباب) طبعا الجواب
الحارس وحلو لوتنادونه وتعطونه هدية رمزية
7- الفكرة السابعة:
يوم الورد / ( تتفقين مع التلاميذ وتقولين لهم باجر كل وحد يقدر يجييب وردة
ويمسكها بطابور الصباح ( اليوم مثلا يوم الورد وكل تلميذ يحضر وردة ويكون
نوع من التغيير بالطاور واصلا شكل التلاميذ وهم ماسكين الورد الصبح حلو
بالطابور وحبذا لو اخر شي تختارين 10 تلاميذ يقدمون الورد حق معلماتهم
علشان لا يصير ربكة
يوم اللون الاصفر / يوم اللون الاحمر/ يوم اللون الازرق ( نفس الشي تتفقين
مع التلاميذ وتقولين لهم لبسوا كابات لون اصفر مثلا ..... او احمر أو ازرق
ويكون شكلهم مختلف شوي بالطابور
يوم البالونات ويكون طبعا كل تلميذ يحضر معاه بالونة اي لون وفي نهاية الطابور يطيرون البالونات
8- الفكرة الثامنة:
اختاري شعار معين ( لا للعنف ... نعم للتسامح) وكتبي لا للعنف ببطاقة حمرة
ونعم للتسامح ببطاقة خضره وطبعا وزعي على التلاميذ هذه الاوراق في الطابور
اختاري الصفوف الامامية افضل شي وحبذا لو كان في مشهد عن العنف يمثلونه في
الطابور وبعدها يطلعون التلاميذ اللي واقفين جدام ويسوون طابور عرض وهم
ماسكين البطاقات وتقولين حق الكل قولوا بصوت واحد ( لا للعنف.... نعم
للتسامح)
9- الفكرة التاسعة
اسئلي المعلمات عن احسن تلميذ منتظم في الحضور واحسن تلميذ في الاخلاق
واحسن تلميذ في حفظ القرآن اخذي ارقام امهاتهم من الاخصائية وقولي لهم
تعالوا الصبح بالطابور وبنكرم عيالكم من غير لا يدرون التلاميذ ان امهاتهم
بيحضرون المدرسة وبالطابور نادي التلميذ فلان الفلاني احسن تلميذ في حفظ
القران وخلي امه تطلع وتقدم له الهدية ( انا خليت الامهات قاعدين بغرفة
الاذاعة ولما ناديت اسم ولدها اطلعت انا اخترت 6 تلاميذ بس للاسف ما حضروا
الا 3 امهات لان الباقي كان عندهم دوامات)
10- الفكرة العاشرة:
مسابقة للعلمات تبدين كلامج وتقولين ( من هي المعلمة الشجاعة القوية اللي
تقدر تشرفنا هني؟ من هي المعلمة الواثقة من نفسها اللي تقدر تشاركنا؟ من هي
المعلمة الجريئة في الحق وصريحة ترفع ايدها؟
(طبعا انا لما قلت هالكلام الكل خاف ومارفع ايده) وانا حاولت اشجعهم وينكم
مافي ولا ابله عندنا جريئة وشجاعة أفاااااااااااا؟ اخر شي عندنا معلمة
مصرية رفعت ايدها وانا قلت لها حياج تفضلي معانا المهم طلعت بالطابور وقلت
لها انتي جريئة وقد كلمتك ؟ قلت لها ما راح تتراجعين او تترددين ؟قالت لا؟
طبعا انا كنت حاطه شي بالكيس وطلعته من تحت الطاولة وقلت لها اوقفي عليه وقوليلنا جم وزنج؟؟
طبعا كان هالشي ( ميزاااااااااااااان)الكل ضحك واستغرب وهي ترددت اول شي
( لانها كانت تختوخه شوي)
المهم الكل كان يقولها يالله صعدي ويصفقون لها بالطابور وهي تضحك متردده اخر شي صعدت وانا قريت وزنها طلع ( 88)
واخيرا وليس اخرا اتمنى تعجبكم هالافكار